LOLHING  TAH  A  HINNA

Christiante hi loinia hop thei ahi. Loi khat chu Christian ahinaa lolhing joulou ahin, chule khat kit chu ahinkhoa lolhinna nei ahi. Pathenin bailam tah-a ijui diuva pha phabep asei tan, hichu ijui uva ahile Christian hinkhoa lolhinna kinei jeng ding ahi. Christian khat lolhinna ding lampi gup Bible in ahilsa aume.

1. Lamdih-a kipat ding : John 1:12, “Amina tahsana ama kisan chengse chu Pathen chate ahina diu thu apetai.”  Christa kisana, keima chonset jeh a kakhela eihuhhing dia thi ahi tia tahsan angai-e. Nang chonsetna tincheng angaidam jouve tijong tahsanin. Na chonset jeh-a nathohna ding jouse khela aman   nachonset man apehsa ahitai.  “Chonset helou helpa chu, Pathen dihna ichen theina diuvin, eiho khelin Pathenin chonsen asemtai” (2 Cor. 5:21). Chule Gal. 3:13, “Danthua kisun chu, thinga kikhaisang tapou chu gaosap chang ding ahi, kiti ahjeh in, Christa chu eiho jalin gaosap achangin danthu gaosapna konin eihung lhatdam tauve.”  Mi tampin thilpha akibola ahile huhhinga kium din atahsanui. Christa hi mihem huhhingna dia athitah jeh in, mi khat in thilpha ahabol poule Pathenin asetna ho angaidam jeng dia gel mi aume.  Jesu Christa tahsan vanga thilpha bol ding ahijoi.

2. Jesu phondoh ding : Mt. 10:32, “Koi hile japi lah-a Christa mi ahi kiphongdoh chan chu, ken jong vana um kapa angsunga kaphon doh ding ahi.”  “Ajeh chu them channa dia lungthima tahsan ding, so chatna dinga kama phondoh ding ahi” (Rom.10:10). Lungthenga Jesu phondoh chu sochatna ahi. Miho henga Jesu akiphondoh tengle aman Pathen henga iphondoh uva, phatthei bohna ichan diu ahi. Khat vei seh bou Jesu phondoh ding tina ahipon, phondoh jing ding tina ahi.  

3. Pathen thu simding : 1 Pet.2:2, “Naosen pengthah bangin huhhingna lama khantouna nanei theina diuvin, halpi beihel lhagao bongnoi chu ngaicha jingun.” Pathen Thu hi ilhagao diuva ahinna bu (an) ahi. Hichun ihinsah uva ihatsah diu ahi. Pathen thu simjing nomlou chu Christian hinkhoa lolhing lou ahi. Koitobang a Christian hinkhoa lhasam aumle, “Niseh-a Pathen Thu nasim jing hinam?” tin dongle chun asim lou anahi ding ahi. Pathen Thua kivah jingho anungchon ngaipoi.

4. Taonaa ponthon : “Tang louvin taovin” 1 Thess. 5:17. Lolhing inge natile taonaa gunchun. Tao chu thil hahsa ahipoi. Taona ding phat kisem jin.  David leh Daniel chu nikhat sungin thumvei anatao ji lhone (Dan.6:10). Hichu thilpha tah ahi. Ps. 55:17 “Nilhah, jingkah, chule suna katao ding chule aman ka-o ajah ding ahi.”  Lhepna in nahin nai tengle Pathen lam ven lang hataovin taovin. Adeh in, thil thum din taovin, khatnaa chihna din taovin (Jacob 1:5), ninaa thahatna din taovin (Isa.40:31), thumnaa Lha-gao thengin napanpina din taovin (Acts 4:31).

5. Christa din tongin :  Mt. 25:29 “Anei-a kipehbea anei letset ding, aneilou vang aneisun jong kilah peh ding ahi.”  Anei chanu mangcha ho chun amube diu, chule aneisun mangcha louten anei khamu jong amansah diu tina ahi. Tekah in, atolop lhomcha hijongle hopsom petei tei ho chu, apelou ho sanga lolhingjo jiu ahi. Christa dia ipi kabol thei umem, tia holjingte chunga Jesu akipah jie. Christia dia nabol doh ahiloule nasei doh chu vana nagou hiding ahi (Mt.6:19-21).

6. Mano jingin : Nunglam gellouva malama kal sona (Phil.3:13-14), chonsetna ngaidam channa dia lung thengsela tao ding (1 John 1:9), chonset louna dia kihon jing ding, ina vangphatna hole ipachanna ho kiletsahpi louva malam nojinga, Jesu lam kat jinga kal son jing angai-e.  Eph.4:13. Satanin niseh a najui jing jeh in ching thei in.

( Rev. M. Haokhothong )