JINGA  SOHDING  MAMUPA

Michel de Nostredame, ahiloule Nostredame, ahikitloule mi tamtah in ahetna amin Nostradamus    amahi December 14, 1503 nikho nin France gamsunga Saint Remy khoa ana penge. Judah nam Issachar phunga kon ahi. Hiche phung hin van, ahsiho, lha, asim thei uva, thusoh thilsoh dingho ahet jiu ahi. Anu insunga apupa chu loule ai them, vana thilsem ho simthem mi ahin, aman Nostradamus hi Greek, Latin, Hebrew, Mathematics, Botany, Astronomy, Pharmacology ho anahile. Nostradamus in sopi pasal thum ana nei in aminu chu, Bertrand, Hector, chule Antoine ahiuve.

Achapan lai-a konin Library a lekha sim sim jeng anabole. Mitphel doi leh khonung ding hetna kitihoa ana thanome. Aumchan adatmo jeh un anule apan University of Montepeller a 1522 kum chun damdoi thudol sim din ana solin, akum 19 ahilai anahi. Chuin 1525 kumin ahin chai-in doctor khat ahitai. Natlen khat ahung laangin, ama jong ajo chanin midamlou jenin anapangin, chule ama semdoh lou (damdoi) khat ana mangchan mi tamtah ahuhhinge. Hijeh chun aminthang in, khopi dangten jong apanpi diuvin anakou uve. Natlen chu akichai phat in Montepeller a ana kilen damdoi simho hilin ana pange. Kum 1531 chun datmo thudol phabep asutna alekhabu masapen ana tatdoh-e. Chuin Agen kiti khoa ana chengin, Adrieta Loubejac kitinu toh ana kichenge. Chapa khat le chanu khat anei lhonin, kum thum vel ajinei jouvin, natlen (plague) ahung laang kit tan, hichun ajinu leh acha teni ana that tai.

Hiche jou 1538 kuma konin kum gup ana mohva vatan, hitia gamtina anavale lai hin khonung ding mamu theina thilpeh anina ana change. Nikhat Nostradamus in vohcha-ching chapang khat akito pin, chuin atouna sangan chunga konin akumlhan hiche chapangpa anga akunin, ana bohkhup-e. Amu doh hon idia hiche chapang chu nachuti jabol ham tia adoh ule aman, “Mitheng chu kajabol angai-e” tin ana donbut uve. Ipi aseina mihon ana hetlou vangun, Nostradamus athi jouva, 1585 kum chun hiche voh-chinglepa chu houlamkai len, Pope Sixtus-V ahung hitai. Hiti hin Nostradamus in thil mamuna tha ana nei-e.

Kum 1547 chun Salon de Craux khopia ana chengin, meithai mihao tah Anne Ponsarde Gemelle kitinu ahin kichenpie. 1550 kum chun thil umchan ho thudol kisutna lekhabu ana tatdoh-e. Hiche lekhabua hin, gole hui umchan, mimle chaang thudol, thil kidang ho asodan ho anajih in ahi. Chuin 1555 kum chun themgao thusei khonunga soh ding phabep asun doh in, ana tatdoh-e. Alekhabu  chu agao thumaseina lekhabu amasapen anahin, amin chu  The Centuries tin ana sah-e. Aminsahna hin kum 100 ho atina vang ahideh poi. Khonung thudol hi thugol li lihon ana jih in, thugol liho ( a stanza of four lines), jakhat khat chu aman Century tia amin sah ahijoi. Hiti chun Century 12 ana tatdoh jouve. Kum 1556 chun France a lengpa Henri in ana kouvin, Paris a ahungin chule lengnun ajipa chule achate hinkho thudol ana kihoulimpin ahi. Nostradamus in akikhen lhon konin lengnu henga ajipa chu mitoh gal kisatnaa akon louna din ana hilchah-e. Hiti chun July 1559  nikho chun gal kisattonaa lengpa Henri hinkho anabei tai. Khonung ding thudol aseidoh ho adih jeh hin, lengnu leh apa khela leng hia achapa Charles-IX in Nostradamus hi lengpa dohle dingleh damdoi thempu din tohmun ana pelhone.  Kum 1566 chun nikhat aseijui Chavigny kitipa henga, “Jinga jingkal niso tengle kahingin neimu tapon nate” anatin, tahbah in ajing jingkal in athisa anahitai. Ama hin French Revolution, Napolean a kipat John F. Kennedy  kitha thu, vannoi gallen ni kisat ding a kona Indira leh Rajiv Gandhi kitha ding, Aurangzeb in hou-in  asuhset ding, Jhansi lengnu Laxmibai gal-hat thudol, Hitler hatna leh lhuhna chule New York a insang ni suhset a aum ding ho, chule adang tampi ana masei doh in ahi. India leh Pakistan gam hi itih ham khat leh galmun ahi ding, chule Qutub Minar insang jong lenna in ahin suhset ding, ana seidoh danin jong miching hon aledoh ui. Aledih nah um tivang aphat tengle kihente.                                                                                    (Rev. M. Hakhothong)