CHENKHOM  LEH  HINKHOM

Leiset a cheng mihem hi apung lheh tai. Hiche mihemte hin tahsa le lhagaova khantou ding damthei ding adei cheh ui. Mihem hijat hi ama ama dinga kisalel cheh ahi.  Ama ding cheh-a akisahlel tah jeh uvin, aheng akomte ngaichat agelpha tapouve. Khat le khat ikikhohsah tolou jeh un, khosung le gamsunga boina atamtai. Mihem koima achanga phathei aumpoi, ti akigeldoh jipoi. Koima kithopi kangaicha poi, tia kigel ho chu mingol ahiuve. Min eikithopi hen itileh, eiman mi kithopi masat ngai ahi. Min eiphatbol hen itile eiman mi phatbol masat ding ahi. Chuti talouvin tulai hin, itile mia ding chu keima kachang dem tia ngaito akitame.

Pathen ingai chauvin, chule mihem jong ingai chauve. Pathen leh mihem panpina ngaicha cheh ihiuve. Mihem in lhagao anei cheh jeh in, lhagao pupa Pathen angaichan ahi. Mihem achanga phathei ahilou jeh in, midang toh lhatkhom, kivopkhom akidei-e. Hiche teni hi pelthei ahipoi. Bible akisim jing a ahile Pathen lungdei akihen, Pathen panpina akingaichat ji jeh in Pathen lungdei bolnomna akinei-e. Pathen lungdei a chonte chu mihem to jong akivop thei joi (Rom.10:17). Midang toh kivop ding dan Pathenin eihilui (1 Pet.2:21). Pakai Jesun atahsante sunga ngailutna achen ding adei lheh-e. Pathen jong ngailut a, iheng ikom jong ngailut ding Jesun adei-e (Mt.22:36-39). Chujongle melmah chule eidoute jeng jong ngailut ding Jesun adei-e. Nasamse te phatthei boh in, navetda te din thilpha bolun, nabolse leh nalung sunate din taopeh un, tin jong asei-e (Mt.5:44). Jesu sei bangin leiset mihemte jouse chontale ihinkhou iti nop ding hitam? Mihemte jouse kibang chet-a nangailut tengule, nangho keima  seijui nahinau min hedoh tante, tin Jesun ana sei-e (John 13:34). Christiante kin masapen chu mi jouse dat neilouva ngailut ding hi ahi.

Aninaa, min i-eilole phaa igel um, hiche bang chun eihon jong bolleu hen aphai, tin Jesun eina hilui (Mt.7:12). Eimunom louhelte din thilpha bolute, taopeh ute (Lk.6:27). Mi jouse dia thilpha bol ding, adeh a Pathen tahsante khohsah ding ahi tin, Paul in ana sei-e (Gal.6:10).  Athumnaa, ichunga chonsete, ichunga thil dihlou bolte ngaidam ding hi ahi. Midang themmona kangaidam bangin keiho dihlouna jong ngaidam in, tia tao ding ahi tin, Jesun eina hilui (Mt.6:14-15). Jesu henga Peter in, kasopi khat in kachunga thilse abola ahile sagivei seh kangaidam ding ham tin ana dongin ahile, Jesun ijatvei hiding ham simsim ngailou ahi, ngaidam dam jeng ding ahi tin, ana donbut-e (Mt.18:22).

Alinaa, mihem khat le khat kikah a kitahsan tona akon-na dia, lungtheng sela kivopkhom jiding ahi.  Katup-u hi Pakai mitmua adih bol seh chu hilouva, mihem mitmua ding jong ahi, tin Paulin ana sei-e (2 Cor.8:21).  Jou pang louva adih jeng seiding tina ahi. Rom. 12:9-12 akisimle Pathen dei-a iti chonding ham ti kicheh tah in akisune. Leiset mihemte lah-a kiphulah nomna lungthim atam jin, ahinla Pathenin phulah chu ama kin ahidan jong asei-e. Kidoupite gilkel dangchahna aumle nehsah donsah ding thudol jong akisune. Christian hinaa iboldiu leh ichonna diu hi abai hih beh in, kijui kimle vang vana kona vangbohna kichang jing ding ahi. Ajeh chu Pathenin ima jouse ahen, ima jouse ajan chule amui. Mihem lei hin ase seida hen, kam-in jahda umho phongdoh dahen, aphalou jousea kona kihei manga, apha kiti tapou bolding thu jong Peter in phatah in asune (1 Peter 3:8-11). Bible in ase bolin ati hih beh-e. Ase bolnomna lung vopten, alungthim uva satan ahung luttai ti kihet jeng hen lang, satan tilna chu nungsun jile ahinkho nom tante.                                                                                              - Rev. M.  Haokhothong -