Football peh a panghon adoi pen chu ipi ham? Tup neilouvin ball peh in pangleu aphat chompi nadiu vem? Ball peh hon atup pen chu lungkhat tah a pankhoma goal khum ding hi ahi. Hiche lungthim hi neihih leu kinahlovin tin goal jong khum povinte. Tup (Focus) hi hinkho sunga panna nei jing ahi. Tahsan hinkho ding hihen lhagao hinkho ding hijongle tup (focus) nei angai-e. Football team khat in atup (adoi) chu, amaho pachanna dinga kihabol chu ahi. Tup kiti hi ball-peh a pang team mi jouse lungsunga aum tengleh ahapan un, akichep-u ahoi in, lolhinna anei jiuve. Team khat a pang michang cheh in tup hi alunga avop ngai ahi. Tup hi kinepna jong ahi.

Ball peh-a pangho lah-a mi khat touvin amaho team minphatna ding sumil hen, amachang seiphat channa ding joh khohsah hen, athepna miho musah nomjo tale hichepa doi le tup chu ama min thanna ding bep hintin, aloiho adontah loujeh chun akichep-u chu chavai tante. Akichem ho lah-a, ki lungto louna umtale, tupna jong chu lhasam tante. Kichepna mun seh thu ahipon mihem khat hinkho jong hi tup nei hinkho ahi angai-e. Tup neilou hinkho mangho chu kichomle kichomle untin lolhinna neiponte. Themjilna hihen, golle pai toh kivopna hihen, houthu lam hihen, jinei-inchenna hijongleh tup neilou mi chu michavai hidohji ahi. Ipi natup ham? Natupna lama chu nathupi teina din hanchemin. 
 
Lhagao hinkhoa jong tupna kicheh neilouva hingho chu tonsot gentheina muna lhung ding ahi. Christian la hia damun meidil sunga lut ding hi, hida umtah ahi. Ahile nalhagao hinkho kikholchil temin ! Hinkho dihtah mang dia nakigot hitam ? Christa sei ngai-a, akhonung juiding ahiteng nalung neoji tam ? Pathen dei hinkhoa nakimanchah pet-a, nasu lungvai dingho leh naloimang dingho chu nadonda hinam ?  Bible a muchi thepa thulem chu geldoh ute (Mt. 13:1-9). Aman muchi chu leipha laitah adoi a anathe ahi. Ahinla abang chu lamchunga, abang song chunga, abang linglah-a achukhai. Hitobang munhoa chukha muchi chivo ho chu phaten ahingdoh joupon ahi. Leipha lai-a chukha muchi ho chu athepa tup bangin phaten akhang touvin ahing hoi-in ahi. Muchi thepa tup chu ipi ham ? Muchi phatea akea, aga thei-a aphatchompi ding chu anatup ahi. Hichu ama kinepna ahi.

Hiche thusima kona isuhmil lou diu chu ahile, tup nei muchi thepa chu ahi. Chutobanga eihon jong ilungsungu mun thenga isemuva Pathen Thu kithelutna thei leipha ihisah-u angai-e. Hitobanga bol mihem jouse din, tup lolhin lelna aum theipoi. Pathen thu hi alangnia hem chemjam (hemto chemjam) ahin, thaneitah ahi (Heb. 4:12). Pathen thu hi ilampi vahsah a pang ahi (Ps.119:105). Pathen douna chonset nabol louna din nalung sunga Pathen thu kikhumin (Ps.119: 11). Aloi agol lah-a lhalou Christian chu khangtou lou ahi. Christian phatah ho hin banga hinga chu football peh-a pang team lungthim nei mi tobang ahi. Pathen thu hi natup jing hinam ? Lhagao hinkhoa tup ding pen chu Jesu nei leh Gospel hinpi hi ahi. Hiche hi Christian khat hinkho kipatna leh kichaina ahi.

 
Leiset a hin napuimang ding taminte. Kichih thei-in. Naloi nagol Christian phaho toh lungkhat in.hingkhom in. Jesu tahsanin, amaa kingai in. Jesu le athu natup jing poule lung mongin, Pathen lenggam mi nahitai. Hichu leiset-a Pathenin nahinsahlo ajeh chu ahi. Hinkhoa Pathen lunglhaina nahol manlouva ahile Pathen kom iti nalhun thei ding ham? Thijouva kisih chu phatchomna bei ahi. Football kichepnaa ilel teng kilunghang hen, ki-kisih hen hijongle min eijosa ahi. Tup nei-in, hia chun kinem in, Pathen sumil hih in, nalolhin tei ding ahi.

( Rev. M. Haokhothong)