CHRISTIAN  LEH  SABBATH  NIKHO

Pathen nitheng nikho hi ipini hintem ? Sabbath nikho hintem, ahiloule Pathenni (Sunday) nihi hintem ? Ipi nikho hi Sabbath nikho ham ? Mi phabep in hiche thudol hi aboipie. Sabbath chung changa thudoh aneinome. Amavang, nikho khat hi Sabbath nikho ahin, nisagini ahin, Bible them hon Sabbath nikho hi Kiginni (Saturday) nihi ahi atiuve. Sunday nikho dalhah a Sabbath joh nit dinga phajom?  Ahile Sabbath nikho hi init tei diuva Pathenin eihilum ? Adonbutna in, Exodus 31:12-13 akisim leh,  Israel chaten Sabbath anit diuvin, Mose henga Pathenin anasei-e. Chule  Exod. 31:16 a, Israel chaten Pathen le amaho kikah-a kinoptona aum hetnaa, melchihna dana Sabbath anit tei diuvin akisei-e.

Tun ihechen tauve. Pathenin Sabbath hi Israelte nit dia anapeh ahi. Midang nit dia apeh ahipoi. Hiche hi Israel le Pathen kikah thudol bou ahi. Tulai-a Sabbath nit-a mi ija um em ? Exod. 35:1-3 ah, Sabbath nikhoa na tongho chu kithat ding chule ainsunga meitih (meicho) umthei louding tin  Mose in ana phongdoh-e. Sabbath nia mei akiti loule bu kihon theilou ding ahitai. Tahbeh a seidin, tulai hin Sabbath nikho hi ahina ding dola nitjou umle akilompoi. Hia nit dia kisei teni lolhing tah a nitjou mi um nantem !

Ahile, nang le kei tulai Christiante henga Pathen lekhabun Sabbath iti nit un eitiuvem ? Col. 2:14, 16 “Eidou daluva pang khut a kisun kihilna lhongpi, Danthu chu Christan anoi manga, hichu asumang soh in...”  ati. Hiche dung jui-a ivetleh Sabbath nit tahih in eitinau ahi. Chujongle mei akicho thei lou dingleh Sabbath nikhoa mei detvah lou ding, jan tengle muthima um ding hipontem ! Chujongle, Christiante din hiche danthu hin thaneina anei tapoi, Jesun hiche hohi cross a akhetbehsa ahitai (Col.2:14). Eihon Sunday init uhi, Sabbath ahi tina ahipon Jesu thodoh nikho ahi tinajoh ahi. Jesu thodoh nikho hi niloupi ahin, eiho masanga Jesu ana tahsan tehon, hapta nimasa Pathenni (Sunday) nikho hi kikhopna nikhoa anamanu ijomu ahi (1 Cor. 16:2, Acts 20:7). Hijeh chun Jesu tahsante kikhopni hi Sunday nikho ahung hijotai.             

( Rev. M. Haokhothong)