Satribari Christian Hospital Chapel a Pathen niseh leh kaikhomna ana kimangji ahijeh in hospitala ana asa damlou ho kom a husan ding chule khong voh ding phal ahipon, hitobanga chu lungna-chim tah a kikhopna thei mun aumlou jeh in, kum 2000 ahung lhuntoh lhonin, Guwahati khopi sung a Hou-in kaikhomna thei ngaichat ahibeh seh jeh in, mun kitup Hou-in khat neidoh tei ding phatsahna ana kinei dung juijin, Church Building Committee 30.01.2000 nin ana kiphutdoh in,  amaho panhat nale houbung mipi hapan jalin, na ahung kitongin Hopsom ho thanomtah a pehcheh ding ti kinoptona dung juijin, member jousen ahin kipecheh in chule inlama a-houbung cheh hetsah nale ngehna ana kinei cheh in, Tahsan Kitepna jong ana kibolin, akibol kit kit in, tuni chanin akiboljing nalaijin, lamkaihon ama ama lhakhat locheh jong ahin peuvin, kot ding toh theijin atoh in, window ding toh thei jin atoh in, cheh ding toh thejin atoh in, thanomtah in alen aneo-atam alhom thu hilouvin, ahung pang cheh un, tuni chan geijin amachal jing-e. Chule Houbung chom chom le mimal hoa konin jong tanglou helin panpina ana kimu jingin ahi. Hitichun, tuni chan geijin, malsomna akidong jing nalaije.Tuni chan geija hiche Hou-in sahna dinga kimu sum agomin lakh 57 alhingtai. Loupina Pathen changtahen!

Kumsom sunga amun akichoh doh thei jongleh aphai ti lunggela, ana um masaho ana kium tahih jongle, khonung a hung umding hon aban ahinjom thei ding tohgona ana kipan ahin, ahinla ginchat sangin Pathen malsomna akiha donin, ana umlui le kitahtah a Pathen na tong jinga houbung neocha cha jong ana phut doha ana viljing, Rev. M. Haokhothong mapuina in, Hou-in mun ding gam kilemtah ana kimun, 2001 sungchun dangka lakh nga manin leimun katha ni ana kichohdoh in, ahin  amun hi themkhat ana neojep jeh in, Sept.02  chun katha 1(khat) Rs.1.25 lakhs manin ana akichoh be kit in agomin 9274 Sq ft. ahin, register jong akiboltai. Phat sot tah Chairman anahi le Hou-in sahna dinga sumto le hol nalama hangsan tah-a ana pangjing, Pu D.P.Haokip lunglutna jalleh, lamkai dang dangho gunchuna jallun, anei kihetna (ownership rigths) lekha chu 03.02.06 in semtupin aumin chule building sahna ding permit le Hou-in dinga Govt. a kona phalna lekha chu 10.08.07 nin ana kimun ahi. Jan.2003 a konin hou-in sah ahung kipanin hiche nia pat 26.04.08 kah sunga hin, houbung tha konna 15(somle nga) vei ana kineijin, agomin nikhotha thagumin 542 ana kisengin, thakonni Hou-in sat lhei (sun) ni hoa “keiho insung nin, neh le chah toh uvinge” tia kipedoh (Pu Sehkai Singson te le Pu T.S.Agou te) jong ana umin, thanom tah in ahung jou lou ho engsetpi bei-in, akon thei theijin lunglhaisella na ana toh jing jeh un machalna nasatah in ana umin, seithei louhelin ana kimachal lheh jenge.

Akigel khoh jing penkhat hi Hou-in sahban- sahchai ding hi ahin, sah le lhanga kona ule naoten jong tuni chan gei-a ngailutna neitah a neipan pinao chunga, eingailu jingu Pakai Jesu Christa jala, khonung jongle neipanpi theinao aumleh, neihin gelkhoh jing uva chule taona a neihin geldoh jing diuvin kahin hetsah nom uve.

Hiche report chomcha ahin, kumsom sunga Pathen phatthei boh nale angailutna akichandan ho le thil ijakai ahung kitoldan le pilhin nadinga thale jung anatoh jouse ho chungchang akijih jou kei theipon, ahin Pakai Jesu Christa tibah khat cheh hina jala inatoh phat hou jouse jalin Pathenin phatthei eiboh cheh uhen. Hou in kisah sung le kumsom kiman chahna sunga hin, mihem akihi jeh in, lungel kibah louna jong ana umkha maithei ahin “Thutah ngailutna nei puma kilhangtah a sei jing ding” akikhohsah le akichepi jeh in, Pathen lungsetna akichangin, hiche lunggel themcha kibahlouna hochun, itih injong kichom khenna, kivetdana, kimithip nale kinohna asodoh khapon, hiche sang chun nasatah a kihet thembena le kingailutna ahin sodoh jo ji-e. Achom lama KWS(G) Houbung min kasei nom pentah uchu “KWS(G) Houbung miten kumsom sunga Pathen toh kilhon khom hi nom kasalheh jeng uve” tihi ahi. Gal le tol jeha thi le man kitoh a genthei laitah a belding neilou ten Pathen kibela, kinepna neilou ten Pathena kikinema kal ana kisong ahin, Pathenin ama a kinem te ajumso ngaipoi tihi akimudoh theije. Pakai Pathen hi kakinepnau le ka gou u ahijingin, “A-Pathenu Pakai hikha nam mite chu anun nomui; Pakaijin amite dia alhendoh mite Anun nomuve” (Psalm 33:12).

Pathenin KWS(G) phungvuh jing tahen!